Sicilianu.org nasci di la me’ necessitati d’aviri ’n locu unni arripustari li cosi ca scopru, capisciu e mparu mentri ca studìu lu sicilianu e, nna lu stissu tempu, di spartìrili cu autri cristiani ca, com’a mia, mustrunu avìri passioni pi’ la nostra bedda lingua e la vulissiru utilizzari nun sulu pir parrari di li cosi di tutti ’i jorna o pir scrìviri puisii pupulari, ma puru comu lingua dutta. Pirchì, sì, lu sicilianu è ’na lingua cumpleta, ca si po usari pir parrari macari di scienza, di politica, di filosofia e di tanti autri cosi!

Pir chissu, dicidìi ca tutti li cuntinuti di ’stu situ hanu a essiri unicamenti in lingua siciliana. Certu, già sacciu ’n partenza ca quarchi palora la vaju sbagghiannu (û spissu!), essennu ca â scola, purtroppu, la me’ generazioni si mal’abituau a usari sulamenti ’u talianu; addamentri, sugnu sicuru ca, facennu pratica e mantinennu la spiranza di ricìviri quarchi bonu cunsigghiu e li giusti currizioni quannu sbagghiu, vaju a ricupigghiari ’n tempu nenti la manera di utilizzari lu sicilianu pi’ comu aviss’a essiri scrivutu e parratu.